IT-p ineriartornera Kommune Qeqertalik inuunerinnissamut periarfissanik nutaanik pilersitsivoq. Silarsuaq minneruleriasaarpoq ammanerulerlunilu. Kommunitsinni siammasissutsip pilersitaanik unammilligassatta immikkut ittut ilaat, IT-p periarfissarititai, kommunimi allaffissornermik, inoqarfinnik innuttaasunillu qaninnerulersitsut iluaqutigalugit, naammassineqarsinnaalerput. Aammattaaq nunarsuaq tamaat eqqarsaatigalugu, tamanna, suleqatigiilernernut, attaveqarfinnut, ilikkakkannut, ilisimasanillu avitseqatigiinnernut nutaanut periarfissaqalersitsivoq, inuussuutissarsiornermut iluaqutaasumik.
Taamaattumik pingaruteqarpoq, IT, kommunip sulinerani innuttaasullu ulluinnaanni, sakkutut tunngaviusutut isigissallugu. Ammasuunerup, oqaloqataanerup teknologiimillu nutaaliaasumik atuinerup kommuni uumasoq qulakkiissavaa, innuttaasut tamat oqartussaaqataaneranni akuusutut misigiffigisaat. Taamaattumik IT-p, innuttaasut kommunillu ulluinnarni oqaloqatigiinneranni, tunngaviusumik pisariitsumillu sakkutut atugaanissaa qulakkeerneqassaaq.
Kommunalbestyrelsip ataavartumik sulissutiginiarpaa, attaveqaqatigiinnerup oqaloqataanerullu sapinngisamik pitsaanerpaanissaat aammalu qaffasissumik inissisimanissaat, assersuutigalugu inoqarfinni sumiiffimmi web atorlugu attaveqaatinut akisussaasup attaveqaatai atorlugit, kommunip quppersagaa aqqutigalugu, paasisitsiniaalluni sulineq siunnerfilimmillu sumiiffinni, nunalu tamakkerlugu, nutaarsiassanik siammarteriffinnik suleqateqarnikkut. Innuttaasut akuutinneqarnerat, aamma innuttaasut ilaatinneqarnerat, pissusissamisoorluinnartumik sakkutut atorneqassapput, tamat oqartussaaqataanerat ataatsimuussutsimillu misigisimaneq nukittorsarniarlugit – naak tamanna digital-ikkoorluni pigaluartoq.
Anguniakkat
- Kommunip IT-mi angallannikkut periaasai ataavartumik annertusarneqassapput pitsanngorsarneqarlutillu, ilikkagaqarnermut, sullissinermut, kommunillu innuttaasunik oqaloqateqarneranut iluaqutaasumik.
- Kommunimi illoqarfinni nunaqarfinnilu tamani qasaasiatigut sullissineq sukkanerusoq aamma assigiaarnerusoq siunertaralugit nukiitorsarneqassaaq.
- Innuttaasut akuutinneqarnerat oqaloqataanerallu annertusiartuinnartumik digital atorlugu pissaaq – minnerunngitsumik inoqarfinni avinngarusimanerpaani. Periaatsit nutaat misiligartuarneqarnissaat pingaartinneqassaaq.
- IT kommunimi meeqqat atuarfiini immaqalu aamma meeqqerivinni atuartitsinermi sakkortunerusumik atorneqalissaaq.
- Kommuneplanip imarisai tamarmik pissarsiarineqarsinnaassapput digital-imillu pitsaasumik nittarsaanneqarlutik, kommunip quppersagaa aqqutigalugu – immaqalu aamma innuttaasunut paasissutissiissutit aqqutigalugit.
- Imaatigut kabel-ip Kangaatsiamut aamma Aasiaannut apuunneqarneratigut, kiisalu Qasigiannguanut radio-kkut sakkortusaaveqarnerup nukiitorsarneqarneratigut qarasaasiatigut attaveqaatit annertuumik pitsanngoriarput.
