Suliffiit
2010-miit 2012 tikillugu, agguaqatigiisillu suliffiit 5.400-t missaanniit, 5.200-t missaannut appariaateqarsimapput. 2012-imiit 2015 tikillugu suliffiit nikerarpallaaratik 5.200-t missaanniittarsimapput.
Nunap immikkoortuinut agguataaraanni, suliffiit affaat Aasianni nassaassaapput, Qasigiannguaniipput 20 %-it, Kangaatsiami 17 %-it aamma Qeqertarsuarmi 13 %-it.
2015-imi Kommune Qeqertalimmi suliffissaaleqisut procent-inngorlugit 10,7 %-iusoq, nuna tamakkerlugu agguaqasigiisitsinermit (9,1 %) qaffasinnerulaarluni. Nunap immikkoortuini sisamaasuni suliffissaaleqisut procent-inngonerat assigiinngitsorujussuuvoq. Nuna tamakkerlugu agguaqatigiisitsinermut Aasianni, Qasigiannguani Qeqertarsuarmilu suliffissaaleqisut procent-inngortinnerat qanittuarasuuvoq, Kangaatsiamili suliffissaaleqisut procent-inngortinnerat qaffasinnerungaatsiarluni (2015-imi 17,6 %-iugami).
Inuussutissarsiorfiit agguataarneqarnerat
Kommune Qeqertalimmi inuussutissarsiorfiit eqimattat marluk annerpaapput tassaasut, pisortat allaffissornerat aamma kiffartuussinerat (41%) kiisalu aalisarneq, piniarneq nunalerinerlu (24%).
Nuna tamakkerlugu agguaqatigiisitsinermut sanilliukkanni, Kommune Qeqertalimmi aalisarnermik, piniarnermik aamma nunalerinermik ingerlatsisuusuni amerlanerpaartaat sulisuupput.
Aasianni pisortat allaffissorneranni kiffartuussineranni suliffiit amerlapput, taamaapportaaq aalisarnerup, piniarnerup nunalerinerup kiisalu niuernerup assartuussinerullu ataanni. Kommunimi qitiusoqarfiusutut illoqarfigisassaani, ukiuni tulliuttuni pisortat allaffissorneranni kiffartuussineranni sulisut malunnaateqarluartumik amerlinissaat naatsorsuutigineqarpoq.
Kangaatsiaq, Qasigiannguit aamma Qeqertarsuaq taamatuttaaq pisortat allaffissorneranni kiffartuussinerannilu kiisalu aalisarnermi, piniarnermi nunalerinermilu sulisunik amerlasuunik peqarfiupput – taamaattoq inuussutissarsiorfinni kingullertut taaneqarluni suliffillit amerlasoorsuunngillat.
Isertitat
2015-imi Kommune Qeqertalimmi illoqutigiit isertitaat agguaqatigiisillugu 345.000 kr.-it missaanniippoq, tamannalu nuna tamakkerlugu illoqutigiit isertitaasa agguaqaatigiisinnerannit 20 %-ip missaanik appasinneruvoq. 2008-iilli nunap ineriartornera peqatigalugu kommunimi isertitat qaffasissusiat qaffakkiartuaarsimavoq.
Nalinginnaasumik illoqutigiit isertitaat, nunaqarfinninngarniit illoqarfinni qaffasinnerusarpoq. Nunap immikkoortui aallaavigigaanni, Qasigiannguani Qeqertarsuarmilu illoqutigiit isertittagaat qaffasinnerpaapput, Aasianni kommunimi agguaqatigiisitsinermit appasinnerulaarluni Kangaatsiamilu, nunap immikkoortuini sisamaasunit, isertitat appasinnersaallutik.
