Kulturi kinaassuserlu

Kommunip pingaartitai sisamaasut - Ataatsimuussuseq, Ilinniarneq, Amerlassuseq aamma Tikiffikkuminartuuneq – annertuumik kalaallit kulturiannut kinaassusiannullu attuumassuteqarpoq. Kulturi, kulturimik ingerlatsivinnuinnaq samminani, aammali peqatigiiffilerinermut, sunngiffimmi sammisanut, sanalunnermut, qimussernermut, kalaallit oqaasiinut aamma kalaallit qangaaniilli ileqquinut, ataatsimoornermik nukittuumik toqqammaveqartunut, sammivoq. Innuttaasunut tamanna ataatsimoorussamik ilisarnaataavoq – soorunalimi kommunimi inuttut ataasiakkaatut immikkuullarissuseqarneq aamma assigiinngissuseqarneq pinngortitaanermiilli aamma taama pissusissamisoortigisoq.

Pingaarnertut naleqartitanit aamma kommunimut nutsertut pitsaanerusumik akuliutsinneqarnissaannik kissaateqarput. Matumani tikerlaanut oqaatsitigut ilinniartitaanissamut pitsaanerusumik neqerooruteqarsinnaaneq periarfissinneqarera ilanngullugu. Taamaaliorneq nutsertunut aamma najukkami innuttaasunut pitsaanerusumik akulerutsitsinikkut naleqarnerulersitsissaaq. Najukkami innuttaasut aamma nutsertut oqaatsitigut avissaarutaasa minnerulernissaannik kissaateqarneq pilersinneqassaaq ilinniaqaqarusussuseqarnermik soqutiginninneq aallaavigalugu taamaaliornikkullu neqeroorutit aamma periarfissat pitsaanerusut pilersillugit.

Kommune Qeqertalik kulturi pingaartitarilluinnarparput, tamatumalu ilisarnaatai tassaapput kulturi uumaasoq nukittoorlu ammalu peqatigiiffeqarneq, ineriartortuartut. Ilisarnaat taanna pigiinnarneqassaaq annertusarneqarlunilu – immitsinnut pilluta, kisiannili aamma tassaammat inuunitsinni toqqammavitta pingaarutillit ilaat: Aalisarneq, piniarneq aamma takornariaqarneq. Ilutigisaannillu, kulturerput tassaatittarparput nunarsuarmioqatitsinnik qaaqqusinitsinni sakkussat pitsaanerpaat ilaat, taamaaliornitsigullu suleqatissanik oqaloqatissanillu nutaanik pilersitsisarluta.

Kulturi assigiinngitsorpassuarnik kiinaqarpoq sinaakkuserneqarnissaminillu pisariaqartitsilluni – silami illullu iluani. Innuttaasunut annermik pingaaruteqarput ulluinnarni peqatigiiffilerinermilu sinaakkuttat, taamaattumillu taakkua immikkut sammineqartariaqarput. Takornarianut tikeraanullu allanut tunngatillugu, pingaartinneqartussat allaapput – matumani kommunip pinngortitami, kulturikkullu misigisassartaasa immikkuullarissut nittarsaannerat ”poortukkiarineqarlutillu”.

Anguniakkat

  • Kommunalbestyrelsi, illoqarfinni nunaqarfinnilu kulturi misigisassanillu periarfissat nukittorsarniarlugit, ataavartumik sulissaaq.
  • Kulturikkut ingerlatsinerup pitsaanerpaanik tigussaasunillu sinaakkutserneqarnissaa qulakkeerneqassaaq, matumani peqatigiiffiit ineriartornissaannut ininik atugassaqartitsineq, katersugaasiviit, atuakkanik atorniartarfiit, katersortarfiit il.il.
  • Kulturikkut ingerlatanut sinaakkusiat, illoqarfiit allanngortitserlugit ineriartortillugillu sulinermi qitiusumik pingaarutilittut, atorneqassapput.
  • Immikkut pingaartinneqassaaq, pisortat inaataanni ataatsimiittarfiit isersimaartarfiillu, qassinik ukioqarneq apeqqutaatinnagu naapiffigineqarsinnaallutillu pulaarfigalugit qasuersaarfiusinnaasut, pitsaalluinnartuunissaasa qulakkeerneqarnissaat.
  • Illu aallarnisaavik aamma iluaqutaasumik kulturikkut neqeroorutinut ingerlatanullu sinaakkutarineqarsinnaavoq.
  • Illut atorneqanngitsut allanngortillugit, kulturikkut sunngiffimmilu siunertanut atorneqarsinnaanerinut periarfissat, nalilersorneqassapput.
  • Illoqarfiit nunaqarfiillu akimorlugit ataatsimoorussat nukittorsarneqarlutillu inerisarneqassapput – ajornanngippat nunagisat akornanni suleqatigiiffiit nutaat aqqutigalugit.
  • Misigisassat aningaasalersorneqarnerat kommunip pilersaarusiornerani pissusisamisoortutut ilaassaaq.
  • Kommunimut nutsertut tikerlaatt oqaatsititigut ilinniarnissamut periarfissai pitsaanerusut.